Emisari i BE-së për dialogun Kosovë-Serbi, Miroslav Lajçak ka thënë se arsyeja pse ka ardhur në Kosovë për të mbajtur takim me kryeministrin Albin Kurti është çështja e planit evropian.
I pyetur për çështjen e themelimit të Asociacionit të komunave me shumicë serbe ai tha se tashmë është e ditur se gjithçka që është nënshkruar, duhet të zbatohet.
Kujtojmë se, Kryeministri i Kosovës, Albin Kurti, i shoqëruar nga zëvendëskryeministri i parë për Integrim Evropian, Zhvillim dhe Dialog, Besnik Bislimi ka pritur sot në ndërtesën e Qeverisë ambasadorët dhe diplomatët e akredituar të misioneve diplomatike në Kosovë.
Siç thuhet në një komunikatë për media, temë qendrore e diskutimit ishte procesi i dialogut, propozimi evropian dhe rruga përpara.
Tutje thuhet se Kurti i njoftoi ata me qëndrimet e Qeverisë së Kosovës përfshirë këtu edhe gjashtë pikat e prezantuara në Seancën e Kuvendit javën e kaluar në lidhje me marrëveshjen e Brukselit të vitit 2013.Ndër të tjerash, ai tha se Kosova ka dëshmuar përkushtimin e saj për dialog përmes qasjes konstruktive dhe propozimeve kreative.
Ai po ashtu shprehu gatishmërinë e tij për takime të radhës në Bruksel të nivelit të lartë politik dhe intensifikim të procesit të dialogut për normalizim të plotë të marrëdhënieve ndërmjet Kosovës dhe Serbisë me njohjen reciproke në qendër.